د طالبانو د ټرانسپورټ او ملکي هوايي چلند وزارت وایي، چې د ایران «اير ټور» هوايي شرکت په لومړي ځل افغانستان ته الوتنې پيل کړې.
یاد وزارت ويلي، چې دغه شرکت به په اونۍ کې دوه ځله د دوشنبې او پنجشنبې په ورځو له کابل څخه تهران او مشهد ته الوتنې ولري.
د طالبانو ټرانسپورټ او ملکي هوايي چلند وزارت د دوشنبې پر ورځ پر خپله اېکس پاڼه ليکلي، چې «د دا ډول هوایي شرکتونو فعالیت د دواړو هېوادونو د مسافرو او سوداګرو د تګ راتګ لپاره اسانتياوې رامنځ ته کوي».
د افغانستان او ایران ترمنځ اریانا-افغان، کام اير، ایران اير، ماهان او کېش هوایي شرکتونه هم فعال دي.
په افغانستان کې واک ته د طالبانو له بیا راګرځېدو وروسته ډېرو هوايي شرکتونو کابل ته خپلي الوتنې بندې کړې.
په تیرو دريو کلونو کې یو شمېر هوایي شرکتونو خپل فعالیتونه بېرته پیل کړي.