سیمهییزو سرچېنو افغانستان انټرنشنل ته ویلي، چې د طالبانو یو رینجر موټر د پخواني حکومت د پوځ د ۲۰۹ شاهین قول اردو درستیزوال جنرال عبدالروف محتاج وهلی او وژلی یې دی.
دغه پېښه د جمعې په ورځ د (تلې په ۲۰مه) نېټه د کابل ښار په یوولسمه ناحیه کې د روسانو پر سړک شوې ده.
دغو سرچېنو ویلي، چې دغه جنرال د کاپیسا د کوهستان ولسوالۍ اوسېدونکی و او د کابل په خیرخانې مېنه کې یې ژوند کاوه.
د دغو سرچېنو په خبره، د طالبانو موټر له پېښې وروسته له سیمې تښتېدلی دی.
ځینو سرچېنو ویلي، دغه پېښه قصدي شوې؛ خو طالبانو بیا په دې اړه څه نه دی ویلي.
طالبانو په تېرو څه د پاسه درېیو کالو کې یو شمیر پخواني پوځیان په بېلابېلو بڼو وژلي دي.
که څه هم چې طالبانو واک ته له رسېدو سره سم عمومي عفوه اعلان کړې؛ خو ملګري ملتونه او د بشري حقونو ملاتړې بنسټونه وايي، چې د پخوانیو پوځیانو وژنه لا هم روانه ده او دغه ډله له پخوانیو ځواکونو غچ اخلي.