د طالبانو مشر هبت الله اخوندزاده په جوزجان ولایت خلکو ته د پنجشنبې په ورځ په یوه وینا کې ویلي، چې دغه ډله د شریعت په لاره کې هېڅ قوت ته نه تسلیمیږي او نه هم معامله کوي.
د طالبانو مشر هبت الله اخوندزاده وايي، چې د دوی دوستي او دښمني د خدای لپاره ده او هېڅ اراده نه لري، چې په هیچا ظلم وشي.
هغه ویلي، چې نظام یې اسلامي نظام دی او دا چې د خدای سره یې وعده کړې چې شریعت په د خدای پر همدې ځمکه پلي کوي او په مکمله توګه به پلي کیږي.
نوموړی دا څرګندونې په داسې حال کې کوي، چې نړۍوالې ټولنې پر طالبانو بندیزونونه لګولي او افغانستان سره یې خپلې مرستې محدودې کړي، چې دغه ډلې باندې فشار راوړي چې بشري حقونو ته درناوی وکړي او پر ښځو او نجونو پراخ بندیزونه پای ته ورسوي.
هغه ویلي؛ امریکا غوښتل چې په افغانستان کې بد اخلاقي رواج کړي او خلک د اسلام له لارې لرې کړي.
هغه زیاتوي: “په همدې خاطر مجاهدینو قرباني ورکړه، خدای هغوی کامیاب کړل او وسره یې مرسته وکړه، مونږ خدای سره بې وفايي نه کوو او اسلام او شریعت به حاکم کوو.”
هبت الله اخوندزاده وايي: “زمونږ جنګ له امریکا او د هغوی له متحدینو سره و، افغانانو سره زمونږ جنګ نه و؛ خو یو شمېر افغانانو ځان د امریکا سپر کړ او ووژل شول.”
د نوموړي په وینا؛ کله چې امریکا خبرو اترو ته حاضره شوه، هغه پوی شو چې امریکا غواړي ووځي.
هغه وايي: “خو لویه اندېښنه زما دا وه، چې د هغوی ملاتړی حکومت به پاتې کیږي او مونږ به مجبوره یو چې افغانانو سره جنګ وګړو، خو د خدای رحم و چې د امریکا له وتلو مخکې دغه حکومت تسلیم شو. “
هغه ادعا کوي، چې عمومي بښنه یې کړې او هغه پلې شوې ده.
طالب مشر اخوندزاده وايي: “هر څوک چې پخواني نظام او امریکایانو سره یې کار کړی عفوه شوي او مجاهدینو اطاعت کړی او هیچا انتقام نه دی اخیستی. داسې اطاعت په دې عصر کې نه دی لیدل شوی. یو نظام د انتقام اخیستو له امله ویجاړیږي او د اطاعت له امله انتقام وانه خستل شو.”
هغه وايي، چې د دغه بښنې په اړه یې له علماو سره مشوره کړې وه او هغوی ورته ویلي وو، چې دا عفوه په شریعت کې ستونزه نه لري؛ خو د شخصي حق په برخه کې باید عفوه ونه شي، چې بیا له عمومي عفوې استثنا شوه.
هغه په داسې حال کې په عمومي توګه د عمومي عفوې د پلي کېدو ټینګار کوي، چې د ملګرو ملتونو او نورو نړۍوالو بنسټونو د راپورونو او د رسنیو د څېړنو له مخې؛ په ډېر شمېر پخواني امنیتي ځواکونه د طالبانو د انتقام اخیستو په موخه وژل شوي، شکنجه شوي او یا هم تري تم شوي دي.
هغه یو ځل بیا له ټولو افغانانو وغوښتل چې بیرته خپل وطن ته راستانه شي، په عزت کې ژوند وکړي او هیڅوک به ورته ضرر ونه رسوي.
هغه وايي، چې طالبان ته دې اماده دي، چې تر ۲۰ کلونو نه بلکې تر ۱۰۰ کلونو پورې له اسلامه دفاع وکړي او شریعت پلي کړي.
اخوندزاده وايي، باید علما کار وکړي او هغه "بد اخلاقي" چې په تېرو ۲۰ کلونو کې روانه وه او کوم تبلیغات چې اوس د دوی پر وړاندې روان دي باید مخه یې ونیسي.
هغه وايي، چې طالبان د هر تصمیم د عملي کولو توان لري؛ خو باید هغه کسان شریعت حاکم کړي، چې د ادارو مشري کوي او دا چې دغه شریعت اول باید په ځان عملي کړي او بیا نورو ته د شریعت د پلي کولو امر وکړي.
د طالبانو د مشر په خبره؛ طالب مشران باید شریعت او عدالت اول په ځان بیا په خپلې کورنۍ او بیا په خپلو ملګرو پلي کړي، بیا دې خلکو ته د پلي کولو امر وکړي.
هغه وايي: “دا شریعت نه دی چې تاسې یې پر نورو په زور تطبیق کړئ او خپله یې پیروي ونه کړی.”
طالبانو څه باندې درې کاله وړاندې پر افغانستان له بیا حاکمیدو وروسته، له شپږم ټولګی پورته د نجونو پر مخ ښوونځي بند کړل او بیا یې د ښځو پر کار کولو او لوړو زده کړو هم محدودیت ولګاوه.
په دې وروستیو کې د دغې ډلې مشر د امربالمعروف قانون په توشیح کولو سره، پر ښځو او د بیان پر ازادۍ پراخ محدودیتونو لګولي او د امربالمعروف محتسبینو ته یې پراخ واک ورکړی.
په دې قانون کې ان د ښځو غږ هم عورت بلل شوی دی.