د پاکستان پوځ وايي، د دغه هېواد د ای اېس ای د مخکېني مشر تر نیولو وروسته یې د فساد دوسیې په تړاو ۳ متقاعد افسران هم ونیول.
د پوځ د عامه اړیکو اداره نن زیاتوي، «د سیاسي ګټو لپاره ناامنۍ ته د لمن وهلو له امله له ځینې پخوانیو افسرانو او د دوی له همکارانو نورې پلټنې هم کېږي.»
دغه اداره په خپل بیان کې زیاتوي چې دې افسرانو د پوځي نظم او ضبط خلاف عمل کړی دی.
د پاکستان پوځ تېره دوشنبه وویل، چې د دغه هېواد د استخباراتو پخوانی مشر جنرال فیض حمید یې نیولی دی.
هغه مهال پوځ ویل، چې ښاغلی حمید د «ټاپ سټي» د استوګنې پروژې د رسوايي په تړاو نیول شوی او د هغه د پوځي محکمې بهیر پیل شوی دی.
دا د پاکستان په تاریخ کې اول ځل دی چې د دغه هېواد د تر ټولو ځواکمنې امنیتي ادارې ای اېس ای پخوانی مشر پر فساد تورنېږي او محاکمه کېږي.
ټاپ سیټي
ټاپ سیټي د خصوصي ملکیتونو پروژه ده او مشرتابه یې وايي، فیض حمید د دوی پر دفترونو او د پروژې د مشر پر استوګنځي چاپه اچولې وه.
دوی محکمې ته ویلي چې د ۲۰۱۷ کال د مۍ پر ۱۲ پولیس او د ای اېس ای مشران د ټاپ سیټي دفتر او د هغې د مالک معیز خان پر استوګنځي چاپه واچوله او د ترهګرۍ د دوسیې په پلمه یې ترې طلا، الماس نورو ګرانبیه توکي او نغدې پیسې یووړې.
دوی زیاتوي چې جنرال حمید د دې پروژې له چارواکو سره خبرو کې ورته ویلي و، نور نیول شوي مواد در کوم، خو څلور سوه تولې طلا او نغدې پیسې نه در کوم.
د پاکستان سترې محکمې د دې مېنې له مشر غوښتي و چې د دفاع وزارت په ګډون اړوند ادارو ته خپل شکایت وکړي.
فیض حميد د ۲۰۱۹ کال په جون مياشت کې د پاکستان استخباراتي ادارې مشر وټاکل شو او د ۲۰۲۱ کال په وروستيو میاشتو کې له همدې دندې ګوښه شو.
نوموړی د پاکستان او همدارنګه تر ټولو بهرنی لوړپوړی چارواکی و، چې د طالبانو واکمنېدو پسې کابل ته لاړ او سرینا هوټل کې له چای سره عکس یې ډېر مشهور شو.