له هغې وروسته چې په کورمې ولسوالۍ کې د سپین ږېرو او مخورو تر منځ روغه جوړه وشوه، په دغې ولسوالۍ کې وضعیت عادي شوی، ښوونځي او دوکانونه پرانیستل شوي او د تګ راتګ لپاره ټولې لارې پرانېستل شوې دي.

کله چې (د جولای په ۲۴مه) د پاړه چنار په بوشهره کې د ملاخېل او بوشهره قومونو تر منځ هوکړه شوې وه؛ خو بیا هم له هغه اوربنده سرغړونه وکړه او دواړو غاړو یو پر بل ډزې کولې، خو له وروستۍ پرېکړې وروسته وضعیت بېرته عادي شوی او په ټوله کې اوربند ټینګ شوی دی.
د قومي مشرانو په وروستۍ جرګه کې چې حکومتي چارواکو هم برخه لرله د کورمې د پولیسو مرستیال مشر جاوید الله محسود له دواړو غاړو غوښتنه وکړه، چې د سولې او امن په ټینګښت کې له زغمه کار واخلي او تېر په هېر حساب کړي او د خپلې سیمې د پرمختګ لپاره دې ګډې هڅې وکړي.
د کورمې ولسوالۍ د مخورو په وروستۍ جرګه کې پرېکړه شوې، چې هیڅ ښکېله غاړه له دې وروسته لویې لارې نه شي بندولای او که هرې غاړې دغسې څه ترسره کړل؛ نو ۱۲ مېلیونه پاکستانۍ روپۍ به جرمانه پرې کوي.
تر دې وړاندې د تاوتریخوالي د پېښېدو سره هرې غاړې هڅه کوله، چې لویې لارې بندې کړي.

د وروستي تاوتریخوالي پر مهال هم د کورمې او پېښور تر منځ لویه لاره بنده شوې وه، چې دې کار په سیمه کې د خوراکي توکو کمښت هم رامنځته کړی و او ان خلکو نه شوای کولای چې د جګړې ټپیان تر پېښوره روغتونونو ته ورسوي، له همدې امله په جګړه کې یو شمېر ټپیان تر روغتونونو و نه رسېدل او د لارو په اوږدو کې یې سا ورکړه.