پاکستاني رسنیو راپور ورکړی، بریټانوي- امریکايي خبریال چارلز ګلاس چې غوښتل یې د تحریک انصاف ګوند مشر عمران خان سره وګوري، پاکستاني چارواکو له خپلې خاورې اېستی دی.
ښاغلي ګلاس هڅه کوله، چې د عمران خان له خور سره یوځای اډیاله زندان ته د هغه د لېدو لپاره ورشي.
پاکستاني رسنیو ویلي، چې د اسلام اباد پولیسو د چهارشنبې په ورځ (د زمري په ۱۰مه) نېټه د بریټانوي- امریکايي خبریال پر استوګنځي چپاو یووړ او هغه ته یې خبر ورکړ چې ویزه یې بې باوره شوې او په راتلونکو څو ساعتونو کې باید له پاکستانه پښې سپکې کړي.
د پاکستان پولیسو نوموړی د یو پاکستاني خبریال له کوره هغه هوټل ته چې هغه په کې اوسېده ورساوه، بیا یې تر هوايي ډګره بدرګه کړ او عربي متحده اماراتو ته یې وشاړه.
ډان ورځپاڼې راپور ورکړی، چې چارلز ګلاس څو ورځې وړاندې د عمران خان له خور علیمه خان سره د اډیاله زندان ته تللی و چې له عمران خان سره وویني؛ خو نوموړي ته اجازه نه وه ورکړل شوې.
دا رنګه جیونیوز ټلویزیون هم ویلي، نوموړي د پاکستان د کورنیو چارو وزیر محسن نقوي څخه هم غوښتي و چې د عمران خان سره د لیدلو اجازه ورکړي، هغه مهال هم دغه غوښتنه نه وه منل شوې.
چارلز ګلاس تر دې وړاندې د مطبوعاتو د ازادۍ په ورځ د (مې درېیمه) هم د عمران خان او د ویکي لیکس د افشا کوونکي جولیان اسانژ د خوشې کولو غوښتنه کړې وه.
هغه ویلي و، چې دوی دواړه د امریکا له غوښتنو په سرغړونو بندیان شوي دي.