پاکستاني پولیسو او امنیتي ځواکونو پلازمېنې اسلام اباد ته ټولې غځېدلې لارې د لاریون کوونکو لپاره تړلې دي، چې ورسره یې عامو خلکو ته هم ستونزې پیدا کړې دي.

تېره اونۍ یو شمېر مخالفو سیاسي ګوندونو خبرداری ورکړی و، چې له کراچۍ او د پاکستان له نورو ښارونو څخه به د لاریون کوونکو کاروانونه پلازمېنې اسلام اباد ته ځي او هلته به د ګرانۍ لوړې مالیې او د برېښنا لوړو بېلونو په غبرګون اعتراضونه او پرلت وهي.
د دغه خبرداري سره هم‌مهاله پاکستاني امنیتي ځواکونو امنیتي نازکو حالاتو ته په اشارې له دغو لاریونوالو او پرلت کوونکو څخه غوښتي و، چې دا مهال د پرلت وهلو لپاره مناسب نه دی او پرلت کوونکي دې له دغې پرېکړې په شا شي.
تر دې وړاندې د جماعت اسلامي مشر حافظ نعيم الرحمان رسنیو ته ویلي و، چې که حکومت د سوله‌ییز اعتراض او پرلت ختمولو هڅه وکړه؛ نو په ټول پاکستان کې به د «ولس ته حق ورکړئ» په نوم سوله‌ییز اعتراصونه د حکومت د نسکورولو په خوځښت بدل شي.
جماعت اسلامي ګوند خپلې دغې اعتراصي غونډې ته د «ولس ته حق ورکړئ» نوم اېښی دی.
دا مهال د پاکستان له بېلابېلو سیمو څخه د دغه ګوند زرګونه کسان د پلازمېنې اسلام په لور خوځېدلي او اسلام اباد ته یې په ننوتو مخه نیوله شوې، د لارو پر سر خنډونه جوړ شوي او کانټینرې اېښودل شوې دي.
څو میاشتې وړاندې هم له بلوچستان څخه اسلام اباد ته د بلوڅو حقوقي فعالانو پر اعتراضي غونډه او پرلت پولیسو برید کړی و او یو شمېر بلوڅان یې ټپیان کړي او نیولي هم وو.