د پاکستان د بهرنیو چارو وزارت د هند له لومړي وزیر څخه غوښتي، چې پر نورو د تورونو لګولو پر ځای، له خپلو پولو څخه بهر خپلو «هدفي وژنو، ویجاړونکو او ترهګریزو کړنو» ته پام وکړئ.
تر دې وړاندې نرېندرا مودي ویلي و، چې پاکستان لا هم له ترهګرۍ او نیابتي جګړې سره خپلې اړیکې ساتلې دي.
د پاکستان د بهرنیو چارو وزارت د جمعې په ورځ په یوې اعلامیه کې د هند د لومړي وزیر څرګندونې د جنګ غوښتلو په مانا بللي او ویلي یې دي، چې دا ډول څرګندونې سیمه ییزه سوله زیانمنوي او د پاکستان او هند ترمنځ د اوږدمهاله اختلافاتو په ځانګړي ډول د جمو او کشمیر پر سر د شخړې د هوارۍ لپاره هڅې «په بشپړه توګه اغیزمنوي.»
د دغه وزارت په اعلامیه کې راغلي: "د هندي مشرانو څرګندونې نشي کولی، د نړۍوالو پام د کشمیر په وړاندې د هند له سخت دریځه واړوي. د کشمیر د خلکو عادلانه مبارزه د دوی د بنسټیزو حقونو او ازادۍ لپاره ده او د مودي څرګندونې دغه خلک له خپل برخلیک د ټاکلو له حق څخه نشي اړولی.
د پاکستان د بهرنیو چارو وزارت ویلي، چې هېواد یې د هند د تهاجمي اقداماتو پر وړاندې مقابلې ته چمتو دی او د هر ډول تېري پر وړاندې د خپلې ځمکنۍ بشپړتیا د ساتنې وړتیا لري. همدا راز، دغه وزارت وایي، چې اسلام اباد په سیمه کې د سولې او ثبات هڅولو ته ژمن دی.
د مودي څرګندونې
د هند لومړی وزیر وايي، چې پاکستان تل خپلو پلانونو پرمخ وړلو کې «شرمیدلی، خو بیا یې هم له خپل تاریخ څه نه دي زده کړي.»
نریندرا مودي وویل، چې د اسلام اباد «ناوړه پلانونه» به هېڅکله بریالي نشي.
نرېندر مودي د کارګل جګړې په یادغونډه کې زیاته کړه: «پاکستان هڅه کوي له ترهګرۍ او نیابتي جګړې سره تړلی پاتې شي، خو خپلو شومو پلانونو کې به کامیاب نه شي.»
د سوېلي اسیا دغه دوه ګاونډي اټومي هېوادونه په خپلو کې خرابې اړیکي لري.
نوی ډېلی له لسیزو راهیسې پاکستان تر خپل واک لاندې کشمیر کې د تاوتریخوالي لپاره د توندلارو په روزلو تورنوي.
پاکستان دا تورونه ردوي او وايي، چې د ډېر وګړې مسلمانې سیمې په توګه د کشمیر د خلکو ډیپلوماټیک ملاتړ کوي.
خو نرېندر مودی پرون په کارګل کې د جګړې په ۲۵ مه کلیزه کې بیا پاکستان د ترهګرۍ په ملاتړ تورن کړی.