په تورخم کې پاکستاني سرحدي چارواکي وايي، چې دوه مېرمنې يې له شپږ کيلو ګرامه نشه يي توکو سره دغه هېواد ته د ننوتو پر مهال نيولې دي.
چارواکو ویلي، چې دغه نشه يي توکي ۷۰ مېلیونه پاکستانۍ کلدارې چې شاوخوا ۲۵۰ زره ډالره کیږي، ارزښت لري.
د تورخم د ګمرک مرستیالې صاعقه عباس د دوشنبې په ورځ وویل، چې دوه مېرمنې هغه مهال ونیول شوې، چې غوښتل یې د غوړیو په قوطیو کې شپږ کیلو ګرامه شیشه پاکستان ته قاچاق کړي.
د مېرمن عباس په خبره؛ له دغو دوو مېرمنو لومړنۍ څېړنې ښيي، چې دوی د قاچاقو عادي کارکوونکې دي.