د بشري حقونو د څار سازمان د ښځو د برخې مشرې د افغانستان په اړه د ملګرو ملتونو د امنیت شورا د تړلو دروازو تر شا پر غونډې نیوکه کړې ده.
هېدر بار وویل، چې د امنیت شورا او د ملګرو ملتونو غړي هېوادونه باید د تړلو دروازو تر شا د غونډو جوړول بند کړي.
اغلې بار په افغانستان کې د ښځو او نجونو وضعیت ته په اشارې سره پر خپله اېکس پاڼه په يوه یادښت لیکلي دي: «افغانان په ځانګړې توګه ښځې او نجونې، چې د طالبانو له خوا تر بریدونو لاندې دي، دا حق لري، چې پوه شي (په دې غونډو کې) پر څه خبرې او پرېکړې کيږي.»
د ملګرو ملتونو امنیت شورا د دوشنبې په ورځ د (کب په ۷مه) نېټه د افغانستان په اړه د تړلو دروازو تر شا غونډه کوي.
د بشري حقونو د څار د ښځو د څانګې مشرې تر دې مخکې د ملګرو ملتونو د تړلو دروازو ترشا پر غونډو نیوکه کړې وه.