له ۱۹ کلنو کم عمره کرېکټ لوبډله چې له تېرو څو ورځو راهیسې په متحده عربي اماراتو کې په تمریناتو بوخته وه، نن سهار یې له یاد هیواد څخه د سوېلي افریقا په لوري سفر پیل کړ.
د افغانستان کرېکټ بورډ وايي، د افغانستان له ۱۹ کلنو کم عمره لوبډله له تمریناتو کولو وروسته نن یک شنبه د (مرغومي ۳مه) له متحده عربې اماراتو څخه د سوېلي افریقا په لور روانه شوه.
افغان کرېکټ بورډ پر خپله اېکس پاڼه لیکلي چې د افغانستان، هند او سوېلي افریقا تر منځ درې اړخیزه لوبلړۍ د ډیسمبر په ۲۹مه پیلیږي او د ۲۰۲۴ کال د جنورۍ میاشتې تر ۱۰مې نیټې به دوام وکړي.
خو کرېکټ بورډ تر دې مهاله په دغه لوبلړۍ کې له ۱۹ کلنو د کم عمره لوبډلې وروستۍ نوملړ نه دی خپور کړی.
یادې یو ورځنۍ سیالۍ د سوېلي افریقا په کوربه توب تر سره کیږي.
د دغې لوبلړۍ ټولې لوبې به د سوېلي افریقا د پلازمېنې جوهانزبرګ د اډوارډینز کرېکټ لوبغالي کې تر سره کیږي.
له یادې لوبلړۍ وروسته د ۲۰۲۴ کال د جنورۍ په ۱۴مه د ۱۹ کلنو نړیوال جام پیلږي.
بل خوا د افغانستان د کرېکټ ملي لوبډله سبا دوشنبې د متحده عربي امارتو په وړاندې خپله لومړۍ پنځوس آوره تمریناتي لوبه پیلوي.
دغه لوبه د عربي اماراتو د شارجې په نړیوال کرېکټ لوبغالي کې د کابل پر وخت سهار لس نیمې بجې پیلیږي.