د افغانستان له ۱۹ کلنو کم عمره ملي لوبډله د سوېلي افریقا او هند له لوبډلو سره درې اړخیزه یو ورځنۍ سیالۍ تر سره کوي.
د افغانستان کرېکټ بورډ وايي، یادې سیالۍ د ۱۹ کلنو نړیوال جام لپاره د لوبډلې د لا چمتوالي په موخه تر سره کیږي.
د افغانستان کرېکټ بورډ د پنجشنبې په ورځ د (لیندۍ ۳۰مه) د یوې خپرپاڼې په خپرولو سره ویلي چې د افغانستان له ۱۹ کلنو کم عمره لوبډله د ډسمبر میاشتې په ۲۹مه نیټه د سوېلي افریقا په کوربه توب د دغه هیواد او هندوستان لوبډلو په شتون کې د درې اړخیزو سیالیو په لوبلړۍ کې ګډون کوي.
او دغه سیالۍ به د ۲۰۲۴ کال د جنورې میاشتې تر ۱۰مې نیټې دوام وکړي.
د افغانستان د کرېکټ بورډ د معلوماتو له مخې په یاده درې اړخیزه لوبلړۍ کې به افغان لوبډله خپل لومړۍ لوبه د ډسمبر میاشتې په ۲۹مه نیټه د هندوستان، دویمه لوبه د ډسمبر ۳۱مه له سوېلي افریقا، دریمه لوبه د ۲۰۲۴ کال د جنورۍ په څلورمه له هندوستان او وروستۍ لوبه به د جنورۍ میاشتۍ په ۸مه نیټه د دوو غوره لوبډلو ترمنځ تر سره شي.
د افغانستان د کرېکټ بورډ اجراییوي مشر نصیب خان د یادې لوبلړۍ په اړه ویلي: «موږ غوره وګڼله، چې نړیوال جام ته له تګ وړاندې خپلې ملي نوولس کلنې لوبډلې ته یادې سیالۍ تنظیم کړو، چې له نېکه مرغه په کې بریالي و، او زه ډاډمن یم چې یادې سیالۍ به د لوبغاړو په لا ډېر چمتووالي کې غوره رول ولوبوي او دوی به د نړیوال جام سیالیو لپاره په ښه توګه چمتو کړي.»
د دغې لوبلړۍ ټولې لوبې به د سوېلي افریقا د پلازمېنې جوهانزبرګ د اډوارډینز په کرېکټ لوبغالې تر سره شي.
له دغې لوبلړۍ وروسته په سوېلي افریقا کې د ۲۰۲۴ کال د جنورۍ په ۱۴مه د ۱۹ کلنو نړیوال جام هم پیلیږي.