آی پې ایل په نړۍ کې د کرېکټ یو له مشهورو لیګونو څخه دی چې سږ کال لس تنه افغان لوبغاړي د یاد لیګ د بولۍ لپاره شارټ لېست شوي.
په دغه سوداګریز لیګ کې به لس لوبډلې د یو او بل پر وړاندې لوبیږي او د بولۍ لپاره ۳۳۳ لولغاړي شارټ لېسټ شوي چې ۱۱۹یې بهرني او پاتې نور یې هندي لوبغاړي دي.
نن سه شنبه د (لیندۍ ۲۸مه) د آی پي ایل لپاره د لوبغاړو بولۍ تر سره کیږي.
د هندوستان د کرېکټ غوره لیګ لپاره دغه بولۍ د لومړي ځل لپاره له هند څخه بهر په متحده عربي اماراتو کې تر سره کیږي.
راشد خان، رحمن الله ګربز، نوین الحق، فضل الحق فاروقي او نوراحمد هغه څلور افغان لوبغاړي دي چې لا له وړاندې په دغه لیګ کې د خپلو لوبډلو له لوري ساتل شوي چې بولۍ ته به نه وړاندې کیږي.
د لوبغاړو د بولۍ مراسم د افغانستان پر وخت د غرمې ۱۲ بجې پیلیږي او له افغانستانه عظمت الله عمرزي، محمد وقار سلامخیل، ابراهیم ځدراڼ، نجیب ځدراڼ، مجیب الرحمن، قیس احمد، محمد نبي، فرید احمد، الله نورغضنفر او اظهارالحق نوید هم ورته نومول شوي دي.
په نړۍ کې د کرېکت د دغه مشهور لیګ لپاره د کرېکټ نړۍ ډیرو مشهورو لوبغاړو، ټریوس هیډ، راچین رویندرا، مچل سټارک، جوش هزل ووډ، پيټ کمنز، ډاریل مچل، وینیندو هسرنګا، لاکي فرګوسن، شاردول ټهاکر تر څنګ نورو لوبغاړو هم نوم لیکنه کړې ده.
د نږدې هر هیواد د کرېکټ د لوبغاړو لویه هیله همدا ده چې د نړۍ په دغه ستر لیګ کې یو ځل ولوبیږي.
یادې سیالۍ د ۲۰۲۴ کال د مارچ په ۲۲ نیټه پیلیږي.