د ښځو حقونو فعالې تمنا زریاب پریاني د جرمني په بن ښار کې د ۲۰۲۳ کال وروستۍ احتجاجي خیمه ودروله.
اغلې پریاني وويل، هغې د ۲۰۲۳ کال د اګست له ۱۲مې د جرمني په بېلابېلو ښارونو کې د جنسيتي توپير د پېژندلو لپاره خپل اعتراضونه پيل کړي و.
نوموړې وايي، تر هغه به خپلو اعتراضونو ته دوام ورکړي، چې جنسيتي توپير په رسميت نه وي پيژندل شوی.
تر دې مخکې د اروپايي ټولنې د بهرنۍ تګلارې مسوول جوزپ بورل د بروکسل په یوه غونډه کې د افغان ښځو او نجونو پر وړاندې د «جنسيتي توپیر» او د طالبانو جوړښت «ویروونکې دیکتاتوري» بللې وه.
د ښاغلي بورل په خبره، په افغانستان کې توپیري چلند د رنګ په اساس نه، بلکې د "جنسیت" پر بنسټ ولاړ دی.
د ۲۰۲۱ کال په اګست میاشت کې واک ته د طالبانو له رسیدو وروسته طالبانو پر ښځو او نجونو سخت بندیزونه ولګول. دا مهال نجونې له خپلو لومړنیو اساسي حقونو هم بې برخې دي.
دا په داسې حال کې ده چې طالبانو د هر ډول اعتراضونو مخه نیولې ده او د ښځو حقونو يو شمېر فعالان د طالبانو په بندخونو کې دي.
د ښځو حقونو لږ تر لږه څلور فعالانې (ژولیا پارسي، ندا پرواني، منیژه صدیقي او پریسا آزاده) اوسمهال د طالبانو په تورو بندخونو کې دي او د هغوی برخلیک لا هم نه دی روښانه.
د بشري حقونو د څار نړیوال سازمان د راپورونو له مخې، پر دغو څلورو ښځو سربېره د ښځو حقونو یو شمېر نورې فعالانې او د روزنیزو چارو مسوولان د طالبانو په بندخونو کې دي.
طالبان د بشري حقونو په ځانګړې توګه د ښځو او نجونو له حقونو څخه په پراخه سرغړونو تورن دي.
د خپلواکو بنسټونو د راپورونو پر بنسټ، طالبانو د ښځو ټول حقونه تر پښو لاندې کړي؛ ان معترضې ښځې تر نيولو وروسته شکنجه کوي او کورنۍ یې هم ګواښي.
خو طالبانو تل دغه ادعاوې بې بنسټه او تور بللې دي.