نن د افغان ورزشي کاروان لومړۍ برخه چې د چین هانګژو ښار ته تللې وه، د درېیو افغان مډال اخیستونکو محسن رضايي، محمد خالد هوتک او نصرت الله حبیبي په ګډون بېرته کابل ته راستانه شول.
دغه ورزشکاران د ووشو او تکواندو لوبډلې د ځوانانو او د ورزش د مينه والو له خوا له تود هرکلي سره مخ شول.
نن د کابل هوايي ډګر څخه تر المپیک ملي کمېټې ودانۍ لاره د افغان ورزشکارانو د راستنېدو له شوره او هیلو ډکه وه.
د درېیو افغان مډال ګټونکو لوبغاړو بېرته راستنېدو د خلکو ستړو مخونو ته مسکا ورکړه او د کابل واټونه یې رنګینه کړي وو.
په هوايي ډګر کې د لوبغاړو د هرکلي لپاره خلک راټول شوي وو.د دغه رياست تخنيکي او مسلکي مرستيال حافظ احمد جان ځدراڼ په هوايي ډګر کې حاضر و.
د ووشو او تکواندو ورزشکاران او ټیمونه د المپیک د ملي کمیټې مرکزي دفتر ته ولاړل او هلته یې د بدني روزنې له عمومي رییس مولوي احمدالله وثیق لوبغاړو سره د لیدنې لپاره راغلی و.
په دې کتنه کې مولوي وثیق د طالبانو له مشرانو وغوښتل چې د ورزشکارانو مالي او معنوي ملاتړ وکړي.
د تکواندو فدراسیون رییس نجیب الله سکندر هم د افغانستان د المپیک د ملي کمېټې د کنفرانسونو په تالار کې د ورزشکارانو لپاره په جوړو شویو مراسمو کې وویل، چې چارواکي باید له ورزشکارانو سره نه یوازې په روحي توګه ملاتړ وکړي، بلکې له هغوی سره مالي ملاتړ هم وکړي. ځکه افغان ورزشکاران د ټولنې له بې وزلو او کم عاید لرونکو طبقو څخه دي او مالي مرستو ته سخته اړتیا لري.
افغانستان تر دې دمه د هانګژو په اسیايي لوبو کې د تکواندو، ووشو او کوریش څلور د برونزو مډالونه ګټلي دي.