سیمه ییزو سرچینو افغانستان انټرنشنل ته وویل، چې طالبانو د ښځو د غورځنګ غړې ندا پرواني له خپل مېړه او زوی سره نیولې ده.
د سرچينې د معلوماتو له مخې؛ طالب جنګياليو دغه لاريون کوونکې مېرمن او کورنۍ يې د سې شنبې په ورځ (د سنبلې ٢٨مه) د کابل په خيرخانې سيمه کې له خپل کور څخه نيولې ده.
د دې غورځنګ مسوولې ژولیا پارسي افغانستان انټرنشنل ته وویل، چې طالب جنګیالیو لومړی د مېرمن پرواني مېړه ارش پرواني ونیو او بیا یې ندا پرواني او د هغې ماشوم له ځانه سره یوړل.
طالب چارواکو د دغې ښځېنه لاریون کوونکې د نیولې په اړه څه نه دي ویلي .
دغه لاریون کوونکې ډله له هغو څو ډلو څخه ده، چې په افغانستان کې د ښځو پر وړاندې د طالبانو د سختو تګلارو له پلي کېدو وروسته رامنځته شوې ده.
طالبانو په تېرو دوو کلونو کې پر ښځو سخت بندیزونه لګولي دي. د طالبانو د پرلپسې حکمونو له مخې؛ نجونې په بشپړ ډول له زده کړو منع دي او ښځې له کار کولو او عامه ځایونو لکه؛ پارکونو، لوبغالو او سپورتي کلبونو کې له ګډون څخه منع شوي دي.
د ښځو احتجاجي غورځنګ په تېرو دوو کلونو کې څو ځلې د ټولنې له عامه برخو د ښځو د ایستلو او د کور په څلورو دیوالونو کې د بندولو پر ضد لاریونونه کړي دي.
له بلې خوا په دې موده کې طالبانو په وار- وار د اعتراض کوونکو ښځو د راټولېدو مخه نیولې او د ښځو فعالان یې نیولي او وهلي یې دي.