په امریکا کې یوې طبي څېړنې ښودلې، چې د هګیو خوړل د مغزو روغتیا ته ګټه لري او د وینې زیان رسونکي کلسټرولو کچه کموي.
د کلفورینیا پوهنتون په دغې څېړنه کې د ۸۹۰ ښځو او نارینوو معلومات څېړل شوي دي. دغې څېړنې مودندلې چې هغه کسان چې اونۍ کې له دوو څخه تر څلورو هکۍ خوري په وینه کې یې د کلسټرول کچه ټیټیږي.
دغه څېړنه په ۱۹۸۸ کې پیل شوې وه او په ۴ کلونو کې یې د څیړنې د ګډونوالو د مغز فعالیت ۳ اړخونه وازمایل. په پایله کې هغو ۵۳۱ ښځو چې هګۍ یې ډېرې خوړلې، د لنډ مهاله او اوږد مهاله حافظې تزلزل کې یې کموالی راغلی. مګر په نارینو کې پایلې داسې نه وې.
څېړونکو ویلي، که څه هم هګۍ په زیاته کچه کلیسټرول لري خو پایلې ښیي چې هګۍ پر روغتیا مثبتې اغیزې لري.
دا لومړۍ څېړنه نه ده، چې ښودلې یې ده چې هګۍ د روغتیا لپاره ګټه لري، تر دې مخکې هم په بېلابېلو څېړنو کې موندل شوي، چې د هګۍ خوړل د شکر ناروغۍ پر وړاندې هم د بدن مقاومت زیاتوي.
په نوې څېړنه کې ښکېلو کارپوهانو ویلي، چې هګۍ پروتین او بېلابېل غذایي مواد لري چې د ذهني فعالیت په ښه کولو کې رول لوبوي.
هغوی زیاته کړه، چې په دې اړه لا زیاتو څېړنو ته اړتیا ده، خو دا څرګنده ده چې دغه خواړه د روغتیا لپاره ګټور دي.