د غزې د ملکي دفاع ادارې د یکشنبې پر ورځ (د تلې ۲۹ مه) اعلان وکړ، چې د غزې په شمالي بیت لاهیا سیمه کې د اسراییل په هوايي برید کې لږ تر لږه ۷۳ تنه وژل شوي دي.
د اسراییل پوځ اعلان کړی، چې د غزې په شمال کې یې د «حماس ترهګريز هدف» باندې برید کړی.
د فرانسې خبري اژانس د غزې د ملکي دفاع ادارې د ویاند محمود باسل له قوله راپور ورکړ چې«د غزې په شمالي ښار بیت لاهیا کې د استوګنې پر سیمه د اسراییل د هوايي ځواکونو د برید په پایله کې ۷۳ فلسطینیان وژل شوي او ګڼ نور ټپیان دي.»
هغه زیاته کړه چې د دغه برید قربانیان اوس هم تر خاورو لاندې دي.
محمود باسل وویل، چې د شنبې په ماښام د هوایي برید له امله د څو کورنیو د استوګنې کورونه سخت زیانمن شوي دي.
له بلې خوا د غزې د دولتي رسنیو دفتر د وژل شویو کسانو شمېر تایید کړی او وايي، چې د اسراييل هوايي ځواکونو د بمبارۍ له امله په وژل شویو کې ښځې او ماشومان هم شامل دي.
د اسراییل پوځ د غزې د چارواکو له خوا د مرګ ژبلې وړاندې شوېشمېرې رد کړې او ویلي یې دي، چې لومړنیو څېړنو ښودلې چې دا شمېرې ددوی له معلوماتو سره سر نه خوري.
د اسراییل د پوځ په وینا دا برید په احتیاط سره پلان شوی و او د «حماس ترهګریز» مرکز یې په نښه کړی و.