رویټرز د بې سرحده ډاکټرانو په حواله راپور ورکړی، چې د جمعې په ماښام د جبالیا کډوالو پر کمپ د اسراییل په برید کې لږ تر لږه ۲۲ تنه وژل شوي دي. وفا فلسطیني رسنۍ ویلي، چې ۳۰ تنه ټپیان شوي او ۱۴ تنه لادرکه دي، چې ښايي تر خاورو لاندې وي.
اسراییلي پوځ د شنبې په ورځ ( د تلې ۲۱) د غزې په شمال مې د جبلیه سیمې د تخلیې امر کړی او د سیمې له اوسیدونکو یې غوښتي چې د سویل په لور ولاړ شي.
د رسنیو د راپورونو له مخې، اسراییلي پوځ له یوې اونۍ راهیسې په جبلیه کې د کډوالو پر کمپ وژونکي بریدونه پیل کړي دي. د بې سرحده ډاکټرانو نړۍوال خیریه سازمان ویلي، چې دغو بریدونو کې په زرګونه فلسطینیان اغیزمن شوي دي.
دا په داسې حال کې ده، چې د اسراییل او فلسطین د جګړې له پیله یو کال تېریږي او د فلسطین د روغتیا وزارت په وینا، د اکتوبر له اوومې راهیسې په غزه کې د اسراییلي بریدونو کې د قربانیانو شمېر ۴۲ زره او ۱۷۵ کسانو ته رسېدلی دی. دغه وزارت وايي، په دغو بریدونو کې لږ تر لږه ۹۸ زره او ۳۳۶ کسان ټپیان شوي دي.