د طالبانو د چاپېریال ساتنې ادارې د ترکیې له سفیر سره په لیدنه کې ویلي، چې افغانستان د اقلیمي بدلون له امله زیانمن شوی؛ خو نړۍوال په چاپېریالي مسایلو کې له افغانستان سره لازمه همکاري نه کوي.
نوموړي په چاپېریالي مسایلو کې له ترکیې څخه د همکارۍ غوښتنه کړې.
د طالبانو د چاپېریال ساتنې ادارې د یوې خبرپاڼې په خپرولو سره ویلي، چې د دغې ادارې عمومي رییس مطیع الحق خالص تېره ورځ د ترکیې له سفیر جنک اونال سره د لیدنې پرمهال ویلي، چې نړۍوال په چاپېریالي مسایلو کې له افغانستان سره لازمه همکاري نه کوي.
نوموړي ویلي، بې وخته بارانونو، طبیعي پېښو او د خطرناکو سېلابونو له امله افغانستان د اقلیمي بدلون له ناوړه اغېزو څخه زیانمن شوی دی.
ښاغلي خالص له ترکیې څخه د چاپېریالي موضوعاتو، تکنالوژۍ او ظرفیت لوړونې په برخو کې د ګډو همکاریو او هوکړه لیکونو د لاسلیکولو غوښتنه کړې.
په خبرپاڼه کې د ترکیې د سفیر له قوله لیکل شوي، چې نوموړي له افغانستان سره د چاپېریالي مسایلو په برخه کې د همکارۍ ژمنه وکړه او د خپل هېواد ملاتړ یې څرګند کړ.
طالبانو له ترکیې څخه په داسې حال کې د چاپېریالي مسایلو په برخه کې د همکارۍ غوښتنه کړې، چې په روان کال کې د بې وخته ورښتونو، طبیعي پېښو او سېلابونو له امله زرګونه کورنۍ زیانمنې شوې دي.
افغانستان په نړۍ کې د اقلیمي بدلون له امله د لسو زیاتو زیانمن شویو هېوادونو په ډله کې شمېرل کېږي.