د افغانستان د ملي مقاومت په نوم د طالبانو مخالفې وسله والې جبهې اعلان کړی، چې تېره شپه یې د کابل او پروان ولایتونو په مربوطاتو کې پر طالب وسله والو بریدونه کړي، چې په پایله کې یې درې طالبان وژلي او درې نور یې ټپیان کړي دي.
دغې جبهې لیکلي، چې بریدونه یې تېره شپه (د وږي ۱۹مه) ترسره کړي دي.
دغه جبهه زیاتوي، چې د کابل ښار په پنځلسمه امنيتي حوزه کې د "دفاع وزارت د لوژستيک ملاتړ د مرکزي ادارې" مخې کې برید کې یې طالبانو يو قوماندان ټپي کړې او دوه ساتونکي يې ووژل دي.
دغه جبهه وایي، دا برید یې د شپې ۸:۵۰ دقیقې د طالبانو پر ګزمې ترسره کړی دی.
د افغانستان د مقاومت جبهه وایي، چې بل برید یې د پروان ولایت د جبل السراج ښار اړوند د متک په سیمه کې د کابل-شمال پر لویه لاره پر طالب وسله والو ترسره کړی، چې دوه طالبان یې وژلي او دوه نور یې ټپیان کړي دي.
دغه جبهه وایي چې بریدونو کې د دغې جبهې ځواکونو ته مرګ ژوبله نه ده اوښتې.
طالبانو په دې اړه تر اوسه څه نه دي ویلي.
له دې وړاندې هم یاد جبهې طالبانو ته په بېلابېلو پېښو کې د مرګ ژوبلې اړولو ادعا کړې ده؛ خو طالبانو یې په اړه څه نه دي ویلي.