طالبانو د ازبکستان په مرسته د بلخ د مرکز مزار شریف په شهرينو کې د ۶ میلیونه امریکايي ډالرو په لګښت د مدرسې جوړلو بنسټ کېښود.
د طالبانو واکمنېدو سره په افغانستان کې ورځ تر بلې بې کاري او بې وزلي زیاتېږي، خو ور سره دې ډلې زرګونه مدرسې جوړې کړې، چې دوه یې په ارګ کې دي.
د طالبانو د بلخ ولایت رسنیز دفتر نن خبرپاڼه کې لیکلي دي، چې دا مدرسه د «خیرالمدارس امام بخاري رحمه الله» نومېږي او د ازبکستان ساختماني چارو وزارت یې په ۱۲ جریبه ځمکه کې جوړوي.
په دې اړه غونډه کې د طالبانو د بلخ مرستیال والي مولوي نورالهادي ابو ادریس او په دغه ولایت کې د ازبکستان د کونسلګرۍ سرکونسل فرقت نظروف کډون کړی و.
د طالبانو د بلخ مرستیال والي خوښي ښودلې، چې بلخ کې د هېواد په سطحه لویه دیني مدرسه جوړیږي.
په بلخ کې د ازبکستان کونسلګرۍ سرکونسل فرقت نظروف د دې مدرسې د پرانیسې غونډه کې د وینا پرمهال وویل، دا مدرسه د طالبانو د بلخ والي یوسف وفا په وړاندیز د ازبکستان ساختماني چارو وزارت له لوري په ۱۲ جریبه ځمکه باندې جوړیږي، چې په لومړی مرحله کې به ۳ جریبه ځمکه باندې د ۱۰۰۰ کسانو لپاره د تعلیم کولو زمینه برابره شي.
طالبانود څه د پاسه درې کلنه واکمنۍ کې، چې افغانان ورځ تر بلې له فقر او بې وزلۍ سره مخ دي، دې ډلې په هر ولایت کې یوه جهادي او هره ولسوالۍ کې یوه دیني مدرسه جوړه کړې ده.
د طالبانو د مشرانو ترمنځه په کابل او ولایتونو کې د شخصي مدرسو د جوړولو سیالي روانه ده او ځینو یې د مدرسو په نومونو دولتي ځمکې نیولي او له سوداګرو د مدرسو په نامه پیسې ټولوي.
د سرچینو د معلوماتو له مخې په کندهار کې ناست د طالبانو مشر ملا هبت الله اخوندزاده له ځینو طالب مشرانو غوښتي، چې په خپل سر د مدرسو جوړولو دا روانه سیالي ودروي.
دغې ډلې په داسې حال کې د جهادي مدرسو د جوړولو کار چټک کړی، چې د شپږم ټولګیو پورته ښوونځي د نجونو لپاره تړلي دي.
پر طالبانو نیوکه دا هم ده چې د عصري زدکړو په برخه کې د نویو مرکزونو جوړولو ته کوم پام نه کوي او همدارنګه د عصري زدکړو پر ځای په دیني زدکړو کې د ځوانانو او ماشومانو ترمنځ په ولایتي کچو سیالۍ کوي.