منابع محلی به رسانه‌ها گفتند در حمله مهاجمان مسلح به کارگران چینی در مرز تاجیکستان و افغانستان، یک شهروند چین کشته شد.
در این حمله در دره زربوز ناحیه شمس‌الدین شهین در ولایت ختلان، چهار شهروند چینی و یک شهروند تاجیکستان زخمی شدند.
به گفته منابع آگاه، این حمله در شب‌های ۲۷ و ۲۸ عقرب صورت گرفت. شهروندان چینی که هدف این حمله قرار گرفتند، در یک معدن طلا در این منطقه مشغول به کار بودند.
یک منبع محلی به وبسایت خبری یانی شفق گفت: «همه قربانیان به شفاخانه‌ای در ناحیه شمس‌الدین شهین منتقل شده‌اند. نیروهای امنیتی در محل حادثه حضور دارند و تحقیقات در جریان است.»
گفته می‌شود که مهاجمان از افغانستان به خاک تاجیکستان آمده و مهندسان و کارگران چینی را مورد هدف قرار دادند.
با این حال، هنوز رسماً مشخص نیست که این حمله توسط قاچاقچیان مواد مخدر یا گروه‌های شبه نظامی اسلام‌گرا انجام شده است.
حکومت تاجیکستان هنوز درباره این رویداد به گونه رسمی اظهار نظر نکرده است.
این حادثه می‌تواند نگرانی‌ها درباره نفوذ گروه‌های مسلح و ستیزه‌جو به کشورهای آسیای مرکزی را افزایش دهد. پیش از این، شبه نظامیان بلوچ در پاکستان به مهندسان و کارگران چینی حملات خونباری انجام داده اند.
تاجیکستان همواره از وضعیت امنیتی در مرز افغانستان ابراز نگرانی کرده و از سازمان شانگهای و پیمان امنیت جمعی درخواست کرده است که تدابیر امنیتی در این مرز را تقویت کنند.
در سه سال گذشته، گزارش‌های متعددی درباره تلاش قاچاقچیان مواد مخدر و گروه‌های افراطی برای عبور از مرز تاجیکستان منتشر شده است. پس از بازگشت طالبان به قدرت در افغانستان، تاجیکستان اقدامات امنیتی مرزی را تشدید کرده و نیروهای بیشتری را در این مناطق مستقر کرده است.
یکی از تهدیدات جدی برای تاجیکستان، گروه انصارالله است که در شمال و شمال‌شرقی افغانستان، به‌ویژه در بدخشان مستقر است. این گروه، که با طالبان متحد است، از مخالفان اسلام‌گرای امام‌علی رحمان، رئیس‌جمهور تاجیکستان به شمار می‌رود.
کمیته دولتی امنیت ملی تاجیکستان در ۶ اگست سال گذشته اعلام کرد که سه عضو گروه انصارالله را از بین برده است. به گفته این نهاد، این افراد در گذشته محموله بزرگی از اسلحه، مهمات، مواد منفجره، تجهیزات ارتباطی و منابع مالی را به تاجیکستان منتقل کرده بودند.