وزارت عدلیه طالبان می‌گوید ۴۰ هزار و ۸۰۰ جریب زمین را در تنگی اجریم در جنوب شرق ولسوالی خلم ولایت سمنگان «امارتی» تثبیت کرده است.

این وزارت همچنین گفت که پرونده‌های دیگر «اراضی غصب‌شده» در سایر مناطق ولایت سمنگان نیز بررسی شده است.

وزارت عدلیه طالبان روز یکشنبه، هفتم دلو، در خبرنامه‌ای اعلام کرد که این تصمیم در نشست هیئت تخنیکی جلوگیری از غصب اراضی طالبان در ولایت سمنگان اتخاذ شده است.

این وزارت درباره پرونده‌های دیگر «زمین‌های غصبی» جزییات نداده است.

طالبان می‌گویند تا کنون زمین‌های زیادی را در مرکز و ولایات به عنوان اراضی غصبی ثبت کرده و به مالکیت دولت بازگردانده‌اند. برخی از شهروندان کشور اظهار می‌کنند که این گروه زمین‌های دولتی را به نام خود ثبت می‌کنند.

با این حال، هیچ مرجع بی‌طرف در افغانستان وجود ندارد که بتواند به شکایات شهروندانی رسیدگی کند که می‌گویند طالبان به‌زور، زمین‌های آن‌ها را به نام «امارتی» ثبت و از آنها می‌گیرند.