د طالبانو تر کنټرول لاندې ملي ټلویزیون خبر ورکړی، چې دغه ډله په کندهار ولایت کې د ۷۹۱ کډوالو کورنیو لپاره یو ښارګوټی جوړوي.
دغه ټلویزیون پر اېکس پاڼه لیکلي، چې د طالبانو د مشر د حکم له مخې د کندهار ولایت په دامان ولسوالۍ کې ۷۹۱ کډوالو کورنیو ته یو ښارګوټی جوړوي.
د دغه خبر له مخې، د دغه ښارګوټي د جوړولو چارې د ۱۲.۵ مېلیونه افغانیو په ارزښت پیل شوې دي.
د دغه خبر په وروستۍ برخه کې راغلي، چې دغه ښارګوټی د طالبانو د کرنې او کور او ښار جوړونې د ریاستونو په ګډه همکارۍ پر ۸۶۰ جریبه ځمکه جوړیږي.
له تېر یوه کال راهیسې د دوو ګاونډیو هېوادونو څخه د افغانانو د ستنېدا لړۍ دوام لري او هره ورځ له بېلابېلو لارو له ایران او پاکستانه په سلګونه کډوال بېرته افغانستان ته ستنېږي.
د ایراني رسنیو په وینا، د روان کال له پيله تر دې دمه ٢٣زره او ١٥٦ تنه بې اسناده افغان کډوال د دوغارون له لارې خپل هېواد ته ستانه شوي دي.
پاکستاني رسنیو بیا راپور ورکړی، چې د روان ۲۰۲۴ کال د (اکتوبر له اومې نېټې د نومبر تر پنځمې) له پاکستانه ۲۶ زره او ۴۵۰ افغان کډوال اېستل شوي دي.
دغه کډوال په ګاونډیو هېوادونو کې د شته ستونزو له امله اړ اېستل کېږي، چې بېرته خپل هېواد ته ستانه شي؛ خو په افغانستان کې هم تر ډېره د دغو کډوالو لویه ننګونه د سرپناه نشتوالی دی.
افغانستان ته ډېری بېرته ستانه شوي افغان کډوال لاهم په پنډغالو کې اوسېږي او هلته له ګڼو ستونزو سره مخامخ دي.