رویټرز لیکلي چې د ډونالډ ټرمپ د واک د لېږد ډله د امریکا دفاع وزارت د افسرانو نوملړ چمتو کوي چې هغوی ګوښه کړي.
ټرمپ ژمنه کړې وه چې که بېرته راستون شي، د پنټاګون یو شمېر چارواکي به له دندو ګوښه کړي، چې له افغانستانه د ځواکونو د ایستلو په بهیر کې هم ښکېل وو.

د راپور له مخې، د امریکا د پوځ د یو شمېر مشرانو نومونه به هم په دغه نوملړ کې دي.
د رویټرز په وینا، د پنټاګون د چارواکو ګوښه کول په دې اداره کې بې ساري بدلون رامنځته کولی شي.
دوو سرچینو چې نه یې غوښتل نوم یې واخیستل شي وویل، تر اوسه څرګنده نه ده چې ایا ډونالډ ټرمپ به پخپله دا پلان تصویب کړي او که نه.
ډونالډ ټرمپ په وار، وار د بایډن پر ادارې نیوکه کړې چې د پنټاګون چارواکي یې نه دي ګوښه کړي. نوموړي د ټاکنیزو کمپاینونو پر مهال په ځانګړي ډول له افغانستان څخه د امریکا د وتلو په بهیر کې د ښکېلو کسانو د ګوښه کولو غوښتنه کړې او ژمنه یې کړې وه چې که ټاکنې وګټي نو دغه کسان به له دندو ګوښه کړي.
یوې سرچینې وویل، احتمال شته چې ټرمپ، د امریکا د پوځ پخوانی مشر مارک میلي ته نږدې خلک له دندې ګوښه کړي، ښاغلي میلي په دې وروستیو کې د باب ووډوارډ په کتاب «جنگ»، کې ټرمپ «بنسټیز فاشیست» بللی و.
سرچینې وویل: «هر هغه څوک چې د میلي له خوا ټاکل شوي او یا لوړو څوکیو ته رسیدلي، له دندو به ګوښه شي. د ټولو هغو کسانو یو لوی نوملړ شته چې له میلي سره تړاو لري، او دوی به ټول له دندو ګوښه شي.»