د سینیګال پوځ د دوشنبې په ورځ وویل، چې د دغه هېواد د پلازمېنې ډاکار له سواحلو څخه شاوخوا ۷۰ کیلومتره لرې په یوه کښتۍ کې یې لږ تر لږه ۳۰ مړي موندلي دي.
پوځ په یوه اعلامیه کې ویلي، چې سمندري ځواکونو ته د یکشنبې په ماښام د کښتۍ د شتون په اړه خبر ورکړل شوی و او د ګزمې یوه کښتۍ سمدستي سیمې ته واستول شوه.
د پوځ په اعلامیه کې راغلي: "تر اوسه پورې دېرش جسدونه شمېرل شوي."
اعلامیه کاږي، چې د مړو د شمېر او کښتۍ په اړه څېړنې روانې دي.
د پوځ په وینا؛ د جسدونو د خرابېدو له امله د پېژندنې پروسه ستونزمنه شوې ده.
د لویدیځې افریقا له ساحل څخه کانري ټاپوګانو ته د اتلانتیک د کډوالۍ لاره، معمولا د افریقایي کډوالو له خوا کارول کیږي، چې هسپانیا ته د رسېدو هڅه کوي.
دغه لار د نړۍ تر ټولو وژونکې لاره ده.
د کډوالۍ د حقونو ډلې واکینګ بارډرز د جون په میاشت کې وویل، چې د ۲۰۲۴ کال په لومړیو پنځو میاشتو کې نږدې ۵۰۰۰ کډوال په سمندر کې مړه شوي چې هڅه یې کوله اسپانوي ټاپوګانو ته ورسیږي.