د طالبانو د ریاست الوزرا اداري مرستیال وايي، صنعتي هېوادونه د ګلتوني ګاز تولید کې اساسي رول لري او له افغانستان سره مرسته یې اخلاقي مسوولیت دی. ښاغلي حنفي د چاپیریال ساتنې د نړیوالې ورځې په مناسبت غونډه کې ویلي، افغانستان د نورو هېوادونو د ګلتوني ګاز د تولید له امله زیانمن شوی.
د طالبانو د رسنیو مرکز نن د یوې خبرپاڼې په خپرولو سره د عبدالسلام حنفي له قوله زیاته کړې، چې چاپېریال د نړۍ د صنعتي قدرتونو له حده زیاتې ګټې اخیستنې له امله تر بل هر وخته له زیات ګواښ او نابودۍ سره مخ دی.
د نوموړي په خبره: «سالم چاپېریال د هر انسان طبیعي حق دی او د سالم چاپېریال رامنځته کولو لپاره باید مونږ ټول دوامداره او مسئولانه هڅې وکړو.»
د طالبانو د ریاست الوزرا اداري مرستیال دغه راز له رسنیو، ځوانانو، تعلیمي ادارو،علماوو او متنفذینو څخه غوښتنه وکړه، چې د چاپېریال ساتنې برخه کې د عامه پوهاوي لوړولو لپاره هڅې وکړي.
له دې سره، د چاپېریال ساتنې ملي ادارې سرپرست هم په دې غونډه کې د وینا پرمهال وویل، چې په ټوله نړۍ کې ایکو سیستمونه له ګواښ سره مخ دي او طبیعي چاپیریال چې د انسان د ژوند سرچینه ګڼل کیږي د ویجاړېدو په حال کې ده.
حافظ عزیز الرحمن وایي: «ټولو هېوادونو ته پکار ده، چې سترو چاپېریالي ننګونو ته د رسیدو لپاره په ګډه کار وکړي.»
د نوموړي په خبره، وچ او نیمه وچ اقلیم، پر طبیعي زېرمو ولاړ اقتصاد، دوامداره وچکالي، د عامه پوهاوي کچې ټيټوالی، د اقلیمي بدلون له امله رامنځته شوې طبیعي پېښې، د جګړو پر مهال د هر ډول ممنوعه وسلو کارول او د نړیوالو سازمانونو د کافي همکارۍ نشتون د افغانستان د چاپېریال د زیانمنېدو لاملونه دي.
د طالبانو د چاپېریال ساتنې ادارې سرپرست دغه راز وایي، چې د اقلیمي بدلون په رامنځته کولو کې د افغانستان رول په نشت حساب دی؛ خو د دې پدیدې له ناوړه اغیزو څخه ډېر اغېزمن هېواد دی.
افغانستان چې د اقلیمي بدلون له اړخه د نړۍ له زیانمنونکو هېوادونو څخه بلل کیږي، د بېلابېلو طبیعي پېښو له امله یې چاپېریال ته سخت زیان اوښتی دی.
د افغانستان لپاره د ملګرو ملتونو د سرمنشي ځانګړې استازې روزا اوتونبایوا هم وايي، چې افغانستان په نړۍ کې د اقلیمي بدلون له امله یو له زیانمنو هېوادونو څخه دی او د اقلیمي بدلون له امله د احتمالي پېښېدونکو زیانونو لپاره یې باید تابیاوې ونیول شي.