د افغانستان لپاره د ملګرو ملتونو د ښځو استازې الیسون ډیویډیان په جلال اباد کې له یو شمېر سوداګرو ښځو او خبریالانو سره وکتل.
د ملګرو ملتونو د ښځو څانګې په ایکس پاڼه لیکلي چې دغو ښځو د خپلو فعالیتونو د ملاتړ غوښتنه وکړه.
د سه شنبې په ورځ د ملګرو ملتونو د ښځو څانګې له لوري په یوه پوسټ کې لیکل شوي چې، سوداګرو مېرمنو په دغه سازمان غږ وکړ چې د ښځو په مشرۍ سوداګرۍ او بازارونو ته د ښه لاسرسي لپاره مالي او تخنیکي ملاتړ ورته چمتو کړي.
اغلې ډیوډیان په جلال اباد کې له خبریالانو سره په اوسنیو حالاتو کې د خپلو فعالیتونو د ملاتړ پر لارو چارو هم خبرې وکړې.
تېر نږدې یو کال د طالبانو حکومت د ښځو پر کار پراخ بندیزونه لګولي دي.
طالبانو د ښځینه خبریالانو او رسنیو د محدودولو فرمانونه هم صادر کړي دي، چې له امله یې یو زیات شمېر ښځینه خبریالانې له دندو ګوښه شوي دي.