په افغانستان کې د ملګرو ملتونو د ښځو برخه وایي، په افغانستان کې ۸۰ سلنه ښځینه خبریالانې د محدودیتونو، ځورونې او ډار له امله اړې شوې چې خپلې دندې پرېږدي.
دغه سازمان ټینګار کړی، چې د افغان ښځینه خبریالانو ملاتړ ته به دوام ورکوي.
دغه سازمان په اېکس پاڼه لیکلي:« د مطبوعاتو د ازادۍ په نړۍواله ورځ او هره ورځ، موږ د رسنیو د نوښتونو او ښځینه خبریالانو ملاتړ ته دوام ورکوو چې د ښځو د حقونو او د جنسیتي برابرۍ د پرمختګ لپاره هڅې کوي.»
په افغانستان کې د طالبانو له بیا واکمنېدو راهیسې ښځینه خبریالانې له خورا محدودیتونو سره مخ دي، چې د دغو محدودیتونو له امله ډېرو یې خپلې دندې پرېښې دي.
د طالبانو لهخوا په لګېدلیو محدودیتونو کې د ښځینه ویاندویانو د مخونو پټول، د نارینه مېلمنو سره پر بحث محدودیت هم شامل دی.
ورته مهال په قطر کې مېشت د افغانستان له پاره د امریکا سفارت ویاند وایي، چې د افغان خبریالانو پر وړاندې د طالبانو د ځورولو پېښې ډېرې شوې دي.
ماریو کریفو د مطبوعاتو د نړۍوالې ورځې په مناسبت په افغانستان کې اطلاعاتو ته د لاسرسي په برخه کې محدودیتونه د اندېښنې وړ بللي.
د خبریالانو د ملاتړ سازمان هم ویلي، چې تر دې مهاله د رسنیو پر وړاندې تر ۳۰۰ ډېرې د تاوتریخوالي پېښې ثبتې شوې دي چې پکې زنداني کېدل، لنډمهاله توقیف، احضار، شفاهي ګواښ او د طالبانو د غوښتنو جبري منل شامل دي.