د پاکستان لومړي وزیر ته د امریکا د ولسمشر د لیک له استولو وروسته د امریکا د بهرنیو چارو وزیر انټوني بلینکن د خپل پاکستاني سیال اسحاق ډار سره په ټیلیفون خبرې کړي دي.
ښاغلي ډار د جمعې په ورځ پر اېکس ټولنیزې شبکې لیکلي چې ښاغلي بلینکن ورسره د ترهګرۍ پر ضد د مبارزې په اړه خبرې کړې دي.
ډار زیاته کړې، چې دواړو لورو د سوداګرۍ، اقتصاد او پانګونې په برخو کې د همکاریو پیاوړتیا په اړه هم بحث کړی دی.
یوه اوونۍ وړاندې د امریکا ولسمشر جو بایډن د پاکستان لومړي وزیر شهباز شریف ته په یوه لیک کې ویلي و، چې واشنګټن له نړۍوالو او سیمه ییزو ننګونو سره د مقابلې لپاره د اسلام اباد تر څنګ ولاړ دی.
د پاکستاني رسنیو په وینا، دا له شهباز شریف سره د جو بایډن لومړنۍ اړیکه وه.