د طالبانو د لوړو زدکړو وزارت د علمي چارو معين وايي، راتلونکې میاشت په ننګرهار کې د اقليم بدلون په هکله «نړيوال کنفرانس» جوړوي.
لطف الله خيرخواه نن په ننګرهار پوهنتون کې خبري غونډې ته وویل، دا کانفرانس به د لوړو زدکړو وزارت په کوربتوب ننګرهار پوهنتون کې د ۳ ورځو لپاره جوړ شي.
باختر اژانس د نوموړي په حواله وايي، په دغه کانفرانس کې به د اروپايي او غربي هېوادونو په ګډون د نړۍ دګڼو هېوادونو استازي او د اقليم بدلون کارپوهان ګډون وکړي.
په دې ناسته کې د ننګرهار پوهنتون مشرپوهاند خليل احمد بهسودوال دا ډول غونډې د اقليم بدلون په اړه د عامه پوهاوي او د پوهنتوني استادانو لپاره ګټورې وبللې.
تېره میاشت په دوبۍ د ملګرو ملتونو په نوښت د اقلیمي بدلون کاپ ۲۸ غونډه هم جوړه شوې وه، خو طالبانو ته پکې بلنه نه وه ور کړل شوې.
په افغانستان کې د ملګرو ملتونو سیاسي استازولی، یوناما، د دې غونډې بهیر کې وویل، افغانستان د اقلیمي بدلون په برخه کې په لسو زیانګالو هېوادونو کې دی، خو له دغې ستونزې سره د مبارزې لپاره تر ټولو لږ چمتووالی لري.
د یوناما په خبره، طالبان لا ندي توانیدلي چې د اقلیمي بدلون سره د مبارزې لپاره یوه پالیسي او عملیاتي چاپیریال رامنځ کړي چې نړیوالو مالي سرچینو ته لاسرسی پیدا کړي.
ملګري ملتونه وايي، په افغانستان کې د درېیم کال لپاره پرله پسې وچکالي، اقتصادي ستونزې او په تیرو دوو کلونو کې د دوو ویجاړونکو زلزلو په ګډون د طبیعي پیښو زیان کچه لوړه شوې.
د اقلیم بدلون په روغتیا، حفظ الصحې، بې وزلۍ، کډوالۍ او په کور دننه بې ځایه شوو وضعيت لا پسې خراب کړی دی.
ملګرو ملتونه وايي، په داسې حال کې چې دوی او نورې مرستندویه ادارې له افغانانو سره مرسته کوي چې د اقلیمي بدلون په وړاندې مبارزه وکړي خو دغه مرستې بسنه نه کوي.